Nómadas en Acción somos una empresa formada por persones qu’ufrimos la nuesa esperiencia na música, el deporte y la cultura, pa desarrollar:
Alcuentrase en:
15-02-2010
Entamamos la semanuca con unes imáxenes del conciertu que Proyecto Jipi fizo’l pasáu 23 de xineru. Tán tomaes na sala La Bombonera. El siguiente enllaz www.youtube.com/watch?v=XhvPimYRR7Q correspuende a la canción "Sueños de paz". Nin el videu, nin el soníu son de calidá, pero esi día la puesta n’escena quedó perbien. El grupu suma yá más de 50.000 visites y casi 3.500 collacios en www.myspace.com/proyectojipiband
09-02-2010
Dempués de les conversaciones que tuvimos col Ayuntamientu d’Alhama de Murcia, y anque nesie momentu tamos reaxustándolo too, podemos confirmar yá que va cellebrase la cuarta edición del festival. Tuvimos buscando una fórmula que-y diere continuidá a esti eventu venceyáu col rock, y yá la topemos. Agora tamos en condiciones de dicir que sedrá’l sábadu 1 de mayu de 2010, que sedrá de baldre y que va lleváse a cau nun recintu distintu al de los dos años anteriores. Ceo llegarán les novedaes nel cartelu, tolos grupos tán esbillaos, pero vamos esperar a tenelo too a punto. En www.myspace.com/mayosrock yá puede vése’l nueu llogotipu.
04-02-2010
El XV Festival Arte-Nativo Viña Rock fizo yá públicu’l cartelu en www.manerasdevivir.com. Cuntará nesta edición con una de les nueses bandes, The Radio Clash y el su tributu en castellán al grupu inglés. Tarán actuando’l sábadu 1 de mayu nel escenariu Viña Clón. Too en www.viñarock.tv
03-02-2010
Casi tres meses dempués de dar fin a la xira "Con el filo de la lengua" y de pasar en Murcia un fin de fiesta pa nun escaecer, Discordia siguen trabayando nel llocal tolos temes que van incluir nel su nueu discu. Nel mes de marzu entama la grabación del que sedrá’l meyor discu de la su yá importante carrera y que cuntará con más d’una sorpresa. Siguií les novedaees del quintu discu nesta web, en www.discordia.com.es y en www.myspace.com/discordiapunk
02-02-2010
The Radio Clash pónse en movimientu. Esta selmana viaxamos a Llondres a grabar un vídeo-reportaxe pal primer discu ‘The Radio Clash 1977′, qu’asoleyará en marzu. Alberto Pla (Boikot) va encargase de la grabación y edición del vídeu clip del tema White Riot y Lucía de Andrés (Manerasdevivir) va facer lo propio col reportaxe fotográficu que realizará pelos sitios de Llondres rellacionaos colos Clash, cola su hestoria… hestoria que formó parte siempre de la nuesa y de la que vos queremos facer partícipes. La cuenta atrás entamó... Tic! Tac!
02-02-2010
A falta de saber el día y la hora d’actuación, Disidencia tán oficialmente confirmaos pal Aúpa Lumbreiras!! de 2010. Como nes últimes ediciones, la llocalidá manchega de Tobarra recibirá a tolos amantes del punk y el rock d’esti país, y podrán disfrutar de los Disi n’estáu puru y en versión orixinal. Prósimamente más datos en www.aupalumbreiras.com
27-01-2010
Con motivu de la cellebración del conciertu conmemorativu del centenariu anarcosindicalista, Manerasdevivir TV fizo un reportaxe con entrevistes a la organización y a los grupos que participaron nesta cita. Puede vese nel siguiente enllaz http://www.youtube.com/watch?v=MDafnOwG3jA . Entamen Disidencia.
26-01-2010
Queremos facer un güecu a esti poema que recita la nuesa collacia Lucia Iglesias nel nuevu discu del Conjunto Os Folkgazais.
Diz asina: Nun quixera deixar de ser aquela nena, que soña e fala brincando. / Subíndome á lúa, e mirando alredor. / Eo nun deixo de ser aquela gota d'auga que baxa polo río, que como eo se chama. / Río arriba encontrara outros ruidos, mais nun tuvo pérdida. / Que máis da únde desemboque, ou a qué ourela se arrime, a quén lle importa de qué beira veña. / Se a alguén lle molesta nun é cousa mía entós. / As andolías volven encontrarse. ¿Por qué me hei oir eo extraña unde fun nena?
Y ye que, entá n’época de crisis, esisten y fáense coses que llenen el nuesu espíritu.
17-01-2010
Al traviés del programa "Emprendedores de Erasmus" que xestiona la Cámara de Comerciu d’Uviéu, 100 empresarios asturianos vamos viacar pa conocer ya intercambiar formes de facer negociu. Nacho viaxará prósimamente a la ciudá escocesa pa entamar la nuesa collaboración con una empresa musical y cultural del país. Na edición impresa del periódicu La Voz de Asturias de güei domingu apaez un reportaxe que fala de too esto. Puede vese también nel siguiente enllaz www.lavozdeasturias.es/noticias/noticia.asp?pkid=537142
12-01-2010
Dempués de munchu tiempu planificando cómo homenaxear a los almiraos The Clash, sal a la lluz el grupu que va tributalos, adaptando y grabando’l su primer discu "Radio Clash 1977" al castellán, y llevando a los escenarios les sus canciones nesti añu d’aniversarios a la banda inglesa. Esti ye un proyectu de llarga duración, yá que la intención ye la d’afayar al castellán la discografía completa del grupu, conservando la rabia de los testos y la fuercia la su música. Artistes de mente inquieta como Txus, que amás de cantar en Disidencia va facelo nesti grupu tributu, o Maki, que compatibilizará Disidencia y Obrint Pas pa ponese tres la batería, asina como’l conocíu Ovidio López a les guitarres que sedrá’l tercer músicu que completará la formación, y too baxo la batuta na producción artística y el soníu d’Óscar Martínez. Esperamos que tolos amantes a la música de los Clash entiendan, escuchen y sientan esta hestoria, col mesmu entusiasmu con que lo van facer estos músicos. La representación dirá a cargu d’esta promotora independiente asturiana, les semeyes oficiales de la banda inmortalizaráles Lucía de Andrés y el su primer videoclip grabarálu en Llondres Alberto Pla, pa posteriormente facer el montaxe definitivu en Madrid. Pa dir abriendo boca escucha temes d’adelantu en www.myspace.com/theclashradio y visita la su web www.theradioclash.net Up the clashers...!
