Nómadas en Acción somos una empresa formada por persones qu’ufrimos la nuesa esperiencia na música, el deporte y la cultura, pa desarrollar:
Alcuentrase en:
22-12-2010
Na web Rockcultura de Chema Granados, prepararon un espaciu pa votar u opinar sobre los meyores músicos, grupos o festis d'esti 2010. Hai nueve categoríes onde apaecen los finalistes, toos ellos aporten nueves idees y valores qu'enriquecen la cultura'l rock. Na categoría Meyor Grupu PunkRock tán nominaos Discordia, de xuru que'l so últimu discu, Fiebre, aportó dalguna cosa disitinta dientro l'estilu. Vota equí
21-12-2010
Queremos deseavos Felices Fiestes a toles y tolos que vos pasáis peresta web, dicen que'l día 22 d'avientu entamen oficialmente les cellebraciones per equí, xusto depués del sorteu de la llotería. Nós vamos tar bien atentos al mozu(a) que cante'l númberu 19.077, una terminación que los amantes del punk y de la música en xeneral conocen perbien. ¡¡Suerte!!
20-12-2010
Tamos preparando un superpack especial de Discordia pa los siguidores y collacios del grupu, trátase d'una edición llimitada que yá pue reservase na nuesa tienda virtual. Inclúi'l chisqueru que dará lluz a los tos conciertos, la gorra que tocará la to tiesta, una chapina con estrella y el llaveru pa nun perder les llaves. Too a un preciu de risa, o anticrisis, o pa tolos bolsiellos, o como seya que lo llamemos,... ¡¡Van escosase!!
16-12-2010
Si, si, fiesta de nuechebueno... ¡Nun nos equivoquemos! Y ye que, Bueno, quieren agradecer con esta fiesta la montonera satisfacciones que-yentregó'l so últimu discu, y pa ello, tocarán unos temes, faerán regalos, pincharán bona música y en definitiva, que pondrán al personal a esfrutar esti sábadu 18 d'avientu. La reunión sedrá a de magar les 22:30 horas en La Industria de Sama de Llangréu, "la so casa". Entrada llibre pal nuechebueno, a la selmana siguiente yá llegará la nuechebona, fun, fun, fun.
15-12-2010
Dende va tiempu, la ONGD Asturies x África, trabaya en dellos proyectos en Gambia. Ca poco, Nacho, que collabora y viaxa con ellos, nos pon al día de les cosas que n'aquel país van faciendo. Pa qu'estos proyectos sigan alantre y puedan facer munches más d'eses coses, vienen de preparar una gala solidaria pa recaudar fondos. Tenemos una cita'l próximu vienres, 17 d'avientu nel Teatru Filarmónica d'Uviéu, de magar les 20:30 hores. La entrada ye por aportación voluntaria, ello ye, debaldre si ún quinxere. Nel cartelu apaecen los artistes solidarios qu'actuarán esa nueche.
15-12-2010
Anque siempre se planifiquen les actuaciones con tiempu abondu, énte dalgunos imprevistos, nada nun se puede facer. Por causes de fuercia mayor nos asuntos personales d'un miembru del grupu Discordia, l'actuación prevista pa esti sábadu 18 d'avientu na Sala Sidecar tendrá que aplazase temporalmente. Pidimos disculpes a tola xente implicada y a les persones que yá mercaron o reservaron la so entrada, pueden recuperar les perres nel puntu de venta onde la mercaron o ponese en contactu para cualesquier dulda nesti correu lletrónicu.
¡Gracies pola vuesa comprensión!
09-12-2010
La meyor forma d'esfrutar n'estáu puru, a un artista, ye velu en directu. Pa cellebrar los cumples d'Osky (9 avi) y Nachín (10 avi), tenemos preparaes dos cites en sendos llocales que programen música en vivu n'Uviéu. La primera con Salsola, que tarán de magar les 22:30 hores nel hestóricu Chigre Cá Beleño, y la segunda, con Bueno, que tocará a eso de les 23:30 hores, nel va poco naguráu Nuncajamás. ¡¡Táis toos convidaos, son de baldre!!!
03-12-2010
La primer edición del Extreme Mas Metal Fest cellebraráse n'agostu de 2011, esti festival qu'organiza l'Asociación Cultural Mas Metal, cuntará con Killus nel so cartelu. La lolcalidá burgalesa de Miranda de Ebro, acoyerá a los soníos y amantes más extremos del metal, instalando la organización una zona d'acampada y un mercadín popular alredor d'esta cita musical braniega.
03-12-2010
Pal sábadu, 18 d'avientu, tenemos una cita na Sala Sidecar de Barcelona, despidiremos l'añu de conciertos cola actuación de Discordia y Corcho. Les entraes anticipaes tán yá a la venta en Discos Tesla (c/ Tallers, 3 - Tienda 2, Barcelona) y Mai Morirem (c/ Torrent de l'Olla, 160 - Barrio Grácia, Barcelona), y tamién disponibles vía internet pa los más cómodos. Y pa los que-yos presta participar nos concursos, tovía pueden llevala de baldre participando nesti que vos proponemos: ¿Cómo se llama l'últimu discu que presenta'l grupu nesta xira? Manda la to rempuesta y los tos datos equí.
30-11-2010
Dende'l pasáu 22 de payares, yá puede vese na Canal Sol Música el nueu video clip de Discordia, Acorralado. Los horarios varíen dependiendo de los díes, con pases na alborada o a les 22:00 hores por exemplu. Si nos van llegando datos más concisos vos mantendremos informaos vía redes sociales. Visita'l facebook del grupu y dexa los tos comentarios...
