Nómadas en Acción somos una empresa formada por persones qu’ufrimos la nuesa esperiencia na música, el deporte y la cultura, pa desarrollar:
Alcuentrase en:
03-11-2010
Dende fae una selmanina, día arriba, día abaxo, Xaime Aranda yá forma parte del equipu de producción de Nómadas en Acción Multiproducciones. Dende'l su sellu autoxestionáu Xunca Records sacó, nestos meses d'atrás, unos cuantos proyectos alantre, agora, xúnese a nós pa danos lo meyor desigo mesmu nes futures producciones y contrataciones. Podéis contactar con él nesti correu lletrónicu y, si vos apetez, da-y la bienvenía.
29-10-2010
Dexamos la información de los conciertos pa esta ponte:
Vienres, 29 pay. - 22:00 hores / Noche de rock (Discordia + Breyten) / Época Musik Club / Lorca, Murcia / Entrada única: 6 € + consumición.
-----
Sábadu, 30 pay. - 23:00 hores / Adveniment de la sardina (Proyecto Jipi) / Plaza de San Cristóbal / Alicante / De baldre.
26-10-2010
El pasáu vienres 22 d'ochobre, dábense a conocer les candidatures finalistes nes seis categoríes de les que consten los VI Premios Sociedáde la Información n'Asturies. Tamos presentes na categoría C-2 Meyor iniciativa TIC empresarial, el ganador, conoceráse nel actu oficial d'Entrega Premios el próximu miércoles 10 de payares a les 19:00 hores, nel Hotel Palacio de Ferrera d'Avilés. Tamos de norabona y vos queremos dedicar a toos esta nominación. Pa nós la satisfacción ye doble, yá qu'una empresa dedicada a la promoción musical del rock y de grupos emerxentes, nun ye fácil que se cuele nesti tipu de gallardones.
25-10-2010
Discordia tarán en Madrid presentando'l su últimu trabayu discográficu, Fiebre, el vienres 5 de payares, únicu conciertu de la banda na capital, nel que van tar acompañaos de los grupos: Surko y Debruces. En 2008 llenemos la Hebe, nel 2009 colguemos el "nun hai billetes" nel Jimmy Jazz, y agora en 2010, llegamos col fiebre al interior del Gruta77 pa llenar hasta l'últimu requexu de la sala. Entraes anticipaes a la venta en Tipo Rosa Negra (c/Montera, 25 - 27) y na taquilla de la sala, abierta durante tol día.
Dexámosvos cola nueva reseña al discu fecha per Antonio Refoyo pa La Mirada Negra y cola entrevista de Fran Llorente pa la revista impresa y también dixital Los + Mejores.
“Fiebre ye un síntoma, ye un estáu d'ánimu, fiebre ye un xiru bruscu na fráxil estabilidá del nuesu cuerpu y la nuesa tiesta, fiebre ye lo que nos entra cada nueche xunto a la persona que s'ama o nel interior d'un chigre o incluso componiendo una canción…” Vicent (cantante y baxista de Discordia)
22-10-2010
Llunes, 25 d'ochobre de 2010. Proyecto Jipi visita l'espaciu CAMON, pa actuar n'acústico y ser entrevistaos nel programa "Más Espectáculo". Concebíu como un show en vivo, grabaráse como un falsu directu dende'l su plató, con públicu, y retresmitiráse a tiempu real per internet dende'l portal www.masespectaculo.com
La cita va ser de magar les 17:30 hores, y amás de la grabación pa TV tamién va distribuise per 108 emisores de radio municipales de tol Estáu español y otres 5 de Llatinoamérica. (Audiencia estimada de 90.000 oyentes).
20-10-2010
Presentamos el video clip Siempre Fiel de Misiva, primer single n'imáxenes sacáu del su nueu discu, Parte de la solución. Aprovechamos pa dar la bienvenida al grupu, dende esti mesmu momentu formarán parte del booking d'esta oficina. Destacar que'l su nueu discu tá editáu en formatu super jewel box doble, billingüe en castellán y asturianu.
19-10-2010
La programación musical de la 48 edición del Festival Internacional de Cine de Xixón, va cuntar cola actuación del grupu Bueno, el llunes, 22 de payares a les 00:00 hores, compartirán escenariu xunto a Sex Museum na Sala Acapulco (Casinu d'Asturies) de Xixón. Entrada de baldre.
08-10-2010
Regular gracies… Asina podemos definir el nuesu tercer añu d'esistencia como Nómadas en Acción Multiproducciones, y lu definimos asina, porque ye la braera realidá y para rendi-y'l nuesu humilde homenaxe al recientemente fallecíu Labordeta.
Podemos definilo tamién -l'añu- como de lluces y de solombres al cincuenta per ciento, y ye que los percorríos de cualesquiera son asina y el de nueso nun podía ser d'otra mena. Como somos, en xeneral y per naturaleza, xente positivo que nos presta quedanos coles coses buenes, eso ye lo que vamos tresmitir. Queremos sacudinos esi estáu de depresión que percorre los últimos tiempos, onde paez qu'equí la xente ya nun come, nin sal, nin disfruta, nin tién agua, nin… pero la realidá ye bien otra. Cuando mires al tu alrodiu, cuando proyectes y vas un poco más alló cola intención de ver, dáste cuenta que sí, que tamos en “crisis” pero, que yá munches persones y munchos países quinxeren pa ellos, lo que nós tenemos.
Nesta época na que mercar el pan, como ye lóxico, va per delantte de cualesquier otra cosa, convién tirar d'imaxinación y xestionar bien los recursos pa poder llevar alantre los proyectos. Tamos na era del reciclaxe, y colo qu'enantes nun nos valía agora pueden facese munches coses, porque, nun too se consigue a bas de malgastar. Somos de los que pensamos que si nun hai trabayu nos lo inventamos, y ye que, puede facese más de lo que la xente piensa, el refraneru tiénlo claro: querer ye poder. Siguimos creciendu al ritmu marcáu, les nueses pretensiones son facer les coses bien y cada día ser meyores en tolos aspectos, cuidando los detalles y a les persones, deprendiendo y enseñando, solo asina, taremos satisfechos de dedicar la nuesa vida a esto que ye lo que nos presta y a lo que nos dedicamos.
De los que nos fallaron nin falamos, esto ye un ciclu y dexámos-y al tiempu que faiga xusticia. Dámosvos les gracies a toos, ellos incluyíos, y vos dexamos con esti cartelu conmemorativu y la nuesa bonita fecha d'aniversariu 10.10.10
Pa cellebralo taremos el llunes 11 d'ochobre na Sala El Juglar de Madrid, difrutando del conciertu de Salsola, onde'l nuesu collaciu y compañeru Paco Flor lleva la batuta de la voz.
04-10-2010
Los nuesos compañeros de ES-3 Producciones fáennos llegar el cartelu promocional cola programación del Interpeñas 2010. Dende esta web queremos recomendar y da-y difusión, a la bayurosa ufierta de conciertos que nos presenten nes diferentes carpes que van instalase en Zaragoza - Fiestes del Pilar.
27-09-2010
Pasín ente pasín el discu de La Hermandad "Reflejos de realidad II" va conquistando mercaos, si anteriormente foi editáu nos países de México y Ecuador, agora-y toca'l turnu a Venezuela, al traviés de la compañía Hazeroth.
La espansión de la banda por Sudamérica sigue'l su rumbu marcáu, gracies al trabayu firme y constante que vienen faciendo durante tou esti tiempu.
