Nómadas en Acción somos una empresa formada por persones qu’ufrimos la nuesa esperiencia na música, el deporte y la cultura, pa desarrollar:
Alcuentrase en:
22-09-2010
Tenemos preparáu un concursu pa da-y la bienvenida a la estación de la seronda, una época del añu na que los festivales al aire llibre caénse como les fueyes y dan pasu a los conciertos baxo techu. Pa tan señalada ocasión vamos sortear, ente tolos que acierten la entruga del final, una entrada pal Independent Fest, y otres dos pa los conciertos de Discordia nel Gruta77 de Madrid y la Sala Sidecar de Barcelona.
La entruga: ¿Cómo se llama la discográfica qu'editó l'últimu discu Fiebre de Discordia? Unvía les tus respuestes al correu lletrónicu nomadasenaccion@telefonica.net enantes del 10 d'ochobre. Los ganadores asoleyaránse nesta mesma web tres díes dempués.
10-09-2010
Dende va unes selmanes incluímos dientro'l nuesu booking a Bueno, grupu indie que, pal que nun lu conoza, puede velu esti vienres 10 de setiembre na Sala Acapulco del Casinu d'Asturies. El conciertu enmárcase dientro los Alcuentros Internacionales de Mocedá KBUÑS 2010 que se cellebren estos díes. L'apertura puertes sedrá a les 21:00 h. y l'actuación del grupu sedrá a les 22:30 h. La entrada ye de baldre.
09-09-2010
Mientres pasaben los calores del branu, dende Nómadas en Acción Multiproducciones y Brücke Agency dábemos los últimos retoques al alcuerdu que finalmente acabamos de roblar, alcuerdu qu'averará al grupu Proyecto Jipi por dalgún de los festivales de música que se cellebren per toa Europa. La gran disposición per dambes partes y la su buena rellación, fexo too esto perfácil, polo que'l futuru preséntase abiertu y enllenu posibilidaes. Esperamos que la nuesa rellación seya llarga y fructífera.
05-09-2010
Presentamos el nueu video clip "Acorralado" de Discordia, esta canción, que ocupa'l tercer corte del su nueu discu "Fiebre", editáu nel mes de mayu por Maldito Records. Grabáu durante la segunda quíncena del mes d'agostu, baxo la dirección de Miguel Tejerina Alba, cuenta cola participación del actor Toño Pantaleón, conocíu poles sus apariciones en famosos spots publicitarios pa televisión. La batuta de la fotografía corrió a cargu de Josu Ubiria Gazpio, too ello col sofitu del equipu técnicu y humanu de Qtuma. Una realización en formatu cinematográficu de la productora audiovisual madrilana Contrasentido PC en collaboración con Zinea Sortzen y Redcam. Contacta dende esta web pa contratar al grupu...
26-08-2010
Toi desconsoláu. Acabamos d'aterrizar de la organización d'una fuerte producción y, tovía col cansanciu a recostines, llégame la noticia de que'l mi buen collaciu Eduardo García del Real "Edu" morrió. El martes pela mañana un infartu lu llevó y ayeri enterrábenlu en Madrid; yá nin m'alcuerdo de cuantos años fae que nos conocemos, miles de batalles xuntos cuando taba en Tick Tack Ticket y agora dende Ticketing-Office, y nun lo puedo creer, nun puedo creer que yá nun vamos volver a falar. Y ye que'l ritmu que llevamos nesti mundín pasa factura. A Edu acaba de pasa-yla y solo quiero decite, collaciu míu, que descanses en paz, que'l tu vacíu yá nun se llena y que yá nun puedo escribir más porque yá me salten les llárimes. Rafa Caballero
26-08-2010
El pasáu sábadu 14 d'agostu acabó la grabación de "Acorralado", nueu videoclip sacáu del quintu discu de Discordia "Fiebre". La productora Qtuma foi la encargada de la realización y posterior montaxe del videu, que sedrá presentáu'l próximu 3 de setiembre a les 22:00 hores nel Centro Cultural de Aledo, y con entrada de baldre. Tolos datos técnicos y la noticia oficial faeránse públicos próximamente.
06-08-2010
Dexamos esta curtia entrevista a Elbicho n'Elpais.com
El grupu aparca'l su soníu flamencu. "Separámonos pero nun nos peleamos", despliquen. Despídense con 'elbicho maquetas 2000-2010 tojunto' y una xira. Descubre dalgunes de les sus anécdotes, accidentes y pequeños "rifirrafes".
Recordamos qu'en collaboración cola su oficina de management, tamos trabayando la zona norte: Galicia, Asturies, Lleón, Cantabria, País Vascu y Zaragoza. Contacta con nós y disfruta de la su música en directo enantes del adiós.
06-08-2010
Tamos a tan solo 10 díes pal entamu del eventu que marcará'l branu en Xixón, el I Alcuentru de Cerveces del Mundu. Sedrán 6 díes pa disfrutar d'un escenariu abiertu nel que van vese más de 40 actuaciones, onde podrán degustase una buena bayura de cerveces del mundu, xintar a buen preciu y recibir regalos, too col meyor ambiente que se pueda imaxinar y al lladín del Mar Cantábricu.
Enantes del chupinazu oficial de salida'l martes 17 d'agostu, faeremos una fiesta de presentación nel emblemáticu Ca Beleño de Xixón. La cita, el llunes 16 de magar les 20:00 hores, con jam session incluyía. Nel facebook del eventu los participantes cuéntense per miles, entra y dexa'l tu comentariu.
02-08-2010
Hai grupos nesti país que nada nun tienen qu'envidiar a los internacionales. Ye'l casu de Killus, una formación que cuida tolos detalles al máximu y que cuenten con una calidá que tá fuera de toa dulda. P'amuesa esti videoclip que presenten col títulu de mesmu nome que'l grupu "Killus", producíu per ellos mesmos nada lu diferencia, si falamos de resultáu, a los grabaos con grandes presupuestos. Entra y dexa que se te pongan los pelos de punta.
22-07-2010
Fin de selmana completu pa Discordia, que tarán presentando'l nueu discu "Fiebre" nel AskuaRock (San Pedro Manrique, Soria) el sábadu 24 de xunetu a les 23.30 hores y llueu cierren a les 5 de l'alborada del domingu 25 el FraguaRock (Gárgoles de Arriba, Guadalajara). Dambos festivales son de baldre y con zona d'acampada.
Esti mes puedes lleer na revista Heavy Rock una entrevista al grupu y la reseña del discu per Charly R'n'R. Tamién nel númberu 200 de la revista Kerrang! sal la reseña de Mariano Muniesa, dambes espublizaciones puedes topales nel tu kioscu habitual. Miguel Rivera en RockTotal fae la su personal revisión al quintu discu del grupu
